Kosova shpalli pavarësinë dhe miratoi simbolet shtetërore
Sunday, February 17, 2008
ET Prishtinë
KosovaLive
KosovaLive
(UPDATE) - Deputetë e Kuvendit të Kosovës, të dielën, në një seancë solemne, miratuan Deklaratën e Pavarësisë, e cila e shpall Kosovën shtet të pavarur dhe sovran si dhe aprovuan flamurin e ri trengjyrësh të Kosovës, duke i dhënë fund kështu, pritjes së gjatë të popullit shqiptarë për të realizuar vullnetin e tyre, për shkëputje edhe formale nga Serbia.
Deklarata u votua nga 109 ligjvënës, pa asnjë votë kundër, ndërsa më pas u nënshkrua nga të gjithë deputetët e pranishëm në Kuvend, përveç atyre serbë, që siç pritej, nuk morën pjesë në seancën e jashtëzakonshme dhe solemne të shpalljes së pavarësisë së vendit.
Në seancë, ndërkaq ishin të pranishëm edhe shumica e shefave të zyrave diplomatike që janë të akredituar në Kosovë si dhe intelektualë e politikan të njohur vendorë e ndërkombëtarë, përfshirë edhe përfaqësuesit e familjes se Komandantit legjendar, Adem Jashari si dhe përfaqësuesit e TMK-së e SHPK-së.
Deklarata u lexua nga kryeministri Hashim Thaçi, dhe më pas u votua nga deputetët e u nënshkrua nga kryetari i vendit, Fatmir Sejdiu, kryeministri Hashim Thaçi, kryetari i Kuvendit, Jakup Krasniqi si dhe të gjithë deputetët e Kuvendit të Kosovës.
